80.

О ХОЖДЕНИИ ЗАХАРИИ

в орду к Мамаю.

ЗАХАРИЯ ПРИШЕД в Орду, и поемше его темныи Князи, поставиша пред Царем своим Мамаем. Захария же все посланные дары от Великаго Князя Димитрия положивши пред нечестивым Мамаем, рече: Государь наш Великий Князь Димитрий Ивановичь всея России в отчествии своем здравствует, и твоего Государскаго здравия присла мя вопросити, и сии дары присла Царския ради почести. Нечестивый же Царь возъярився и паче исполнися ярости и гордости окаянный, абие сверг башмак от правыя ноги, и рече: Захария! се ти дарую от великия славы твоея пришедшу от ноги моея отпадшее. Такова бо есть наша Царская почесть, аще кого хощем жаловати. Захария же воздаде честь мудре нечестивому Цареви. Царь же подивися мудрым ответом Захарииным и повеле присланныи дары воином взяти, рекущи: возмите себе то и купите себе плети на кони. Злато бо и сребро Князя Димитрия все будет в руку моею; Землю же его разделю служащим мне, а самаго приставлю стадо пасти верблюжее. Тогда Захария ревностию разжегшися о Государе своем и рече Мамаеви: что глаголеши сие таковому Великому Государю? Бог елико хощет, то сотворит, а не яко же ты хощеши. Предстоящии же хотяху Захарию убити: но запрети Мамай, и нача прельщати Захарию мягкими словесы, обещая его властеля в Руссии сотворити. Захариа же такожде лесть восприемши в сердце своем, да от рук его скорее свободится, рече к Царю: не подобает послу не совершивши посольства своего Государя, к иному Царю престати. Прежде повели ми книги дати посольныя и посольство совершу, и паки к тебе возвращуся Царю, да тако и тебе верен буду, яко не солгах первому Государю. Нечестивый же Царь уловлен бысть мудрыми словесы Захарьиными, и отпусти его писанием к Великому Князю Димитрию. Посла же с Захариею и четырех Князей честных и любимых своих, Постельника своего, да Дьяка, да Конюшего и Ключника, и с ними некиих Татар.





 



Главная | В избранное | Наш E-MAIL | Добавить материал | Нашёл ошибку | Вверх